Familja Frrokaj nga Zvicra bën me shtëpi të re familjen Muslijaj në Gjakovë

Bashkatdhetari ynë që jeton në Zvicër, Kened Frrokaj ka bërë të lumtur familjen Muslijaj nga fshati Plançor i komunës së Gjakovës. Familja Muslijaj jetonte në kushte të mjerueshme banimi, por falë bashkëfshatarit, jeta e kësaj familje ka ndryshuar tërësisht.

Familjes 7 anëtarëshe iu ndërtua një shtëpi e re, tridhomëshe, me të gjitha kushtet e nevojshme të banimit.

I gjithë ndërtimi i kësaj shtëpie është donacion i familjes Frrokaj, raporton TV Syri në Gjakovë.

Kenedi në fillim mbylli dyert e barakës në të cilën kishte jetuar familja Muslijaj, e cila kishte një hapësirë të vogël dhe pak kushte normale për jetë.

Pastaj ai dorëzoi çelësat e shtëpisë së re, vlera e të cilës është rreth 36 mijë euro, dhe ofron të gjitha kushtet për jetesë.

Kryefamiljari Besim Muslijaj me lot në sy falënderon familjen Frrokaj për ndërtimin e kësaj shtëpie.

Albinfo.ch