Ferizaj: Bie nga kati i nëntë, vdes 19 vjeçari me shtetësi të huaj

Lidhur me rastin është njoftuar prokurori kujdestar i cili i ka autorizuar hetuesit rajonalë që t`i ndërmarrin të gjitha veprimet hetimore

Sot, rreth orës 00:35 të mëngjesit, policia rajonale e Ferizajt, ka marrë një informacion se një person, shtetas i huaj me inicialet B.G, i moshës 19 vjeç, në rrugën “Sali Çeku”, ka rënë nga kati i nëntë i një ndërtese.

Personi në fjalë është dërguar në Emergjencën e Spitalit në Ferizaj për ndihmë mjekësore, e më pas për trajtim të mëtejshëm mjekësor është transferuar në QKUK-Prishtinë, shkruan rtklive.com. Por nga atje, është konfirmuar se personi ka vdekur.

Policia e rendit i ka ndërmarrë veprimet e nevojshme dhe në këtë rast janë inkuadruar edhe hetuesit dhe krim-teknikët e Sektorit Rajonal të Hetimeve.

Janë kontaktuar edhe familjarët e viktimës, sipas të cilëve dyshohet se ai është hedhur nga kati i IX-të i ndërtesës.

Lidhur me rastin është njoftuar prokurori kujdestar i cili i ka autorizuar hetuesit rajonalë që t`i ndërmarrin të gjitha veprimet hetimore dhe trupi i pajetë është dërguar në Institutin e Mjekësisë Ligjore në Prishtinë për autopsi.

Gjithashtu është njoftuar edhe ILEC-u për vdekjen e shtetasit të huaj. Rasti është cilësuar ” vetëvrasje” ka bërë të ditur zëdhënës i Policisë së Kosovës në Ferizaj, Kanun Veseli, transmeton albinfo.ch.

---