Filharmonia e Kosovës debuton me sukses në Berlin

Nën dirigjimin e Marion Wood, Orkestra e Kosovo Philharmonic Orchestra së bashku me koret ndërkombëtare sollën një përvojë unike korale 360° për publikun në kryeqytetin gjerman.

Një mbrëmje e veçantë artistike u zhvillua në Berlin, ku Kosovo Philharmonic Orchestra realizoi me sukses debutimin e saj në kryeqytetin gjerman. Koncerti u drejtua nga dirigjentja Marion Wood dhe u organizua në bashkëpunim me Choralspace Festival Choir, Konzertchor Münster dhe Kosovo Philharmonic Choir, shkruan albinfo.ch.

Mbrëmja ofroi një eksperiencë të veçantë korale 360°, duke krijuar një atmosferë të fuqishme artistike që u mirëprit me entuziazëm nga publiku në Berlin. Interpretimet e artistëve sollën emocione të veçanta dhe një nivel të lartë profesionalizmi në skenë.

Në këtë koncert performuan solistët e njohur: sopranot Kaltrina Miftari dhe Elona Sadiku, mexosopranoja Flaka Goranci, tenori André Khamasmie dhe basi Simon Robinson, të cilët me interpretimet e tyre kontribuuan në suksesin e kësaj mbrëmjeje.

Programi i koncertit përfshiu vepra të rëndësishme të repertorit klasik, ndër to Robert Schumann me veprën “Requiem für Mignon, op. 98b”, kompozitorin kosovar Valton Beqiri me veprën “Ballin lartë!” dhe Antonín Dvořák me veprën monumentale “Stabat Mater, op. 58”.

Ky koncert shënoi një moment të rëndësishëm për Kosovo Philharmonic Orchestra, duke përfaqësuar një hap të rëndësishëm në prezantimin e kulturës dhe artit kosovar në skenat ndërkombëtare.

Organizatorët shprehën mirënjohje të veçantë për CHORALSPACE dhe për bashkëpunëtorët e shumtë që kontribuuan në realizimin e koncertit, ndër ta edhe Gent Lazri. Falënderime u adresuan gjithashtu për Ministria e Kulturës, Rinisë dhe Sportit e Republikës së Kosovës dhe për zëvendësministren Nora Arapi për mbështetjen dhe praninë e tyre në këtë aktivitet të rëndësishëm kulturor.

Në fund të mbrëmjes, publiku në Berlin e shpërbleu koncertin me duartrokitje të gjata, duke e kthyer debutimin e Filharmonisë së Kosovës në një sukses të veçantë artistik. /Albinfo.ch

---