Fitnesi të paguhet nga sigurimi shëndetësor, si çdo terapi tjetër

Mjekët do të duhej tu përshkruanin pacientëve me mbipeshë ushtrime fitnesi, ashtu siç u përshkruajnë barna ose terapi tjera për sëmundje të ndryshme. Rrjedhimisht, sigurimi bazë shëndetësor duhet të mbulojë shpenzimet e krijuara në këtë mënyrë. Këtë e kërkon shoqata e qendrave zvicerane të fitnesit (SFGV) në një iniciativë të prezantuar të premten në Bernë, me moton “Po për mjekësinë e lëvizjes”.

Iniciativa synon luftimin e sëmundjeve “të civilizimit” dhe që nuk janë të trashëgueshme si mbipesha, sëmundjet e qarkullimit të gjakut dhe disa sëmundje të caktuara psikike.

Ushtrimet e fitnesit do të mbështetnin njerëzit për të udhëhequr një stil të shëndetshëm jete shkruan SFGV. Shoqata synon që së shpejti ta dorëzojë iniciativën në Zyrën Federale dhe të fillojë grumbullimin e nënshkrimeve. Për të qenë e vlefshme iniciativa duhet të mbledhë 100.000 nënshkrime brenda 18 muajve.