Forma e regjistrimit të mërgimtarëve, shqetësuese

Kanë mbetur pa u regjistruar qindra mijëra mërgimtarë, që janë jashtë Kosovës

Nëse jeni me kombësi kineze dhe jetoni në Kosovë për çështje biznesi, atëherë ju mund të regjistroheni. Por, nëse një kosovar ka një vëlla që jeton në Gjermani, nuk mund ta regjistrojë nëse ai tashmë ka një shtëpi të veten këtu. Këto janë përgjigjet në dy pyetje ndihmëse në faqen zyrtare të regjistrimit të popullsisë në Kosovë.

Kështu kanë mbetur pa u regjistruar qindra mijëra mërgimtarë, që janë jashtë Kosovës. Rezultatet nuk do të jenë të plota pas përfundimit të regjistrimit të popullsisë nëse nuk bëhet edhe regjistrimi i rregullt i qytetarëve, që përkohësisht jetojnë jashtë Kosovës.

KMLDNJ-ja kërkon shtyrje të afatit për regjistrimin e kosovarëve që jetojnë jashtë vendit. Ata që jetojnë jashtë regjistrohen në formularin S1, që është shumë i thjeshtë, krahasuar me pyetësorin individual për personat rezidentë në Kosovë.

Pas përfundimit të regjistrimit, do të fillojë procesi i pasregjistrimit për t’u testuar mbulueshmëria dhe cilësia e të dhënave, e cila do të zgjasë nga 16 deri më 22 prill.