Franca mposht Marokun 2:0 dhe siguron gjysmëfinalen e Kupës së Botës

KEYPIX - France's Manu Kone and Morocco's Neil El Aynaoui (24) battle for the ball during the World Cup quarterfinal soccer match in Foxborough, Mass., near Boston, Thursday, July 9, 2026. (AP Photo/Mark Stockwell)

Franca është gjysmëfinalistja e parë e Kupës së Botës 2026. Skuadra e drejtuar nga Didier Deschamps triumfoi 2:0 ndaj Marokut në çerekfinale, falë golave të Kylian Mbappé dhe Ousmane Dembélé, të shënuar brenda gjashtë minutave në pjesën e dytë.

“Gjelat” dominuan takimin nga minuta e parë dhe krijuan raste të shumta shënimi. Heroi i Marokut ishte portieri Bono, i cili mbajti ekipin e tij në lojë me disa pritje vendimtare, përfshirë edhe një penallti të pritur ndaj Mbappé në minutën e 28-të.

Pavarësisht rezistencës së marokenëve, presioni francez dha rezultat në minutën e 60-të, kur Mbappé realizoi me një goditje të saktë nga brenda zonës për epërsinë 1:0. Vetëm gjashtë minuta më vonë, Ousmane Dembélé dyfishoi shifrat me një goditje të ulët nga distanca, duke vulosur praktikisht fatin e ndeshjes.

Maroku e nisi më mirë pjesën e dytë, por nuk arriti të konkretizojë rastet. Goditja e parë dhe e vetme në portë erdhi vetëm në minutën e 83-të, kur Azzedine Ounahi provoi nga distanca, por Mike Maignan priti pa vështirësi.

Në minutat e fundit Franca administroi me qetësi rezultatin, ndërsa Bono vazhdoi të shmangte një humbje më të thellë me disa pritje të tjera cilësore.

Me këtë fitore 2:0, Franca siguron kualifikimin në gjysmëfinalen e tretë radhazi të Kupës së Botës dhe vazhdon rrugëtimin drejt një tjetër trofeu botëror. Në gjysmëfinale, skuadra e Didier Deschamps do të përballet me fituesin e çerekfinales tjetër.