Franca përballet me valë ekstreme të të nxehtit, zjarret shkatërrojnë mijëra hektarë pyje

Një zjarrfikës humbi jetën gjatë ndërhyrjes, ndërsa temperaturat kanë arritur deri në 41 gradë Celsius në disa zona të vendit

Franca po përballet me një valë intensive të të nxehtit, e cila ka përkeqësuar situatën me zjarret pyjore dhe ka vënë në provë autoritetet, ndërsa dhjetëra mijëra hektarë janë përfshirë nga flakët, përcjell albinfo.ch.

Sipas të dhënave të Sistemit Evropian të Informacionit për Zjarret në Pyje (EFFIS), të analizuara nga Agjencia Franceze e Lajmeve (AFP), rreth 78 mijë hektarë janë djegur vetëm gjatë tetë ditëve të para të korrikut, krahasuar me mbi 44 mijë hektarë në të njëjtën periudhë të vitit të kaluar.

Situata është rënduar edhe më shumë nga erërat e forta, të cilat kanë vështirësuar punën e zjarrfikësve në disa rajone të vendit.

Gjatë ndërhyrjes për shuarjen e një zjarri pyjor në Alpet Franceze, një zjarrfikës vullnetar 22-vjeçar humbi jetën, pasi po luftonte me flakët në një terren të pjerrët.

Ndërkohë, vala e të nxehtit vazhdon të përhapet në pjesën veriore dhe lindore të Francës. Autoriteti meteorologjik Météo-France ka vendosur 67 departamente në nivel alarmi portokalli, ndërsa ka paralajmëruar se edhe pesë departamente të tjera do t’i bashkohen këtij niveli të rrezikut.

Sipas parashikimeve, kjo valë e nxehtësisë pritet të zgjasë të paktën deri në fundjavën e ardhshme.

Temperaturat gjatë ditës kanë arritur nga 38 deri në 41 gradë Celsius, kryesisht në juglindje të vendit, ndërsa në aeroportin e Montpellier dhe në qytetin e Perpignan janë regjistruar temperatura rekord prej 40.7 gradë Celsius për muajin korrik.

Meteorologët theksojnë se kjo është vala e tretë e të nxehtit që godet Francën brenda më pak se dy muajsh, pas episodeve të regjistruara në fund të majit dhe gjatë gjysmës së dytë të qershorit.

Për shkak të temperaturave ekstreme, edhe kompania kombëtare hekurudhore franceze SNCF është detyruar të anulojë disa linja, pasi nxehtësia ka ndikuar në funksionimin e rrjetit elektrik që furnizon trenat me energji./Albinfo.ch

---