Francë, arrestohen dhjetëra persona për destabilizim të Lojërave Olimpike

Keystone EPA/MAST IRHAM

Ministri i Brendshëm francez, Gerald Darmanin, ka thënë se të hënën se dhjetëra persona janë arrestuar në Francë, si të dyshuar për destabilizimin e Lojërave Olimpike.

Darmanin tha për kanalin televiziv France 2 se forcat e sigurisë arrestuan rreth 50 persona, përcjell Albinfo.ch.

“Ata kishin planifikuar të kryenin aksione sabotuese ose protesta radikale, gjatë garave të para olimpike, por autoritetet e parandaluan këtë”, tha ai.

Gazeta “Le Parisien” raportoi se 45 anëtarë të lëvizjes radikale mjedisore “Extinction Rebellion” ishin arrestuar.

Ata kishin planifikuar aksione për të protestuar kundër pasojave sociale dhe ekologjike të Lojërave Olimpike.

Gazeta “Le Figaro” raportoi se një aktivist i krahut ultra të majtë u arrestua dje në Oissel – rreth 121 kilometra në veriperëndim të Parisit, transmeton atsh.

Zyra e prokurorit të Parisit tha se ky arrestim nuk lidhej me hetimin për zjarrvëniet që ndërprenë trafikun hekurudhor të premten – disa orë përpara ceremonisë së hapjes së Lojërave Olimpike – që preku qindra mijëra udhëtarë.

“Asnjë arrestim nuk është bërë ende lidhur me atë incident”, tha zyra e prokurorit.

Darmanin tha gjithashtu për “France 2” se zyra e tij e dinte se kush mund të qëndronte pas atyre sulmeve.

“Ne kemi identifikuar një sërë profilesh të individëve që mund të kenë kryer këto akte sabotazhi të qëllimshme”, tha ai./Albinfo.ch