Francë: Qeveria lehtëson kufizimet anti-COVID për udhëtimet

@pixabay

Kufizimet e rrepta për udhëtimet midis Mbretërisë së Bashkuar dhe Francës po lehtësohen.

Nga e premtja, të gjithë udhëtarët, pavarësisht nga statusi i vaksinimit, do të duhet të paraqesin një test negativ të kryer maksimumi 24 orë para për të hyrë në Francë.

Personave të vaksinuar nuk do t’u kërkohet më të japin një arsye bindëse për të vizituar vendin dhe nuk do të duhet t’i nënshtrohen një periudhe izolimi.

Ndërsa personat e pavaksinuar do të duhet të paraqesin një arsye bindëse, të plotësojnë një formular dhe të respektojnë një karantinë të rreptë 10-ditore në vendndodhjen e zgjedhur nga vetë ata që do të monitorohet nga policia.

Lajmi u bë me dije nga zyra e kryeministrit francez, Jean Castex, i cili tha se lehtësimi vinte për shkak të mbizotërimit të Omicron në të dy vendet.

Franca rivendosi kufizimet e udhëtimit me Mbretërinë e Bashkuar në prag të Krishtlindjeve, pasi varianti i ri, i zbuluar për herë të parë në Afrikën e Jugut në nëntor, po përhapej me shpejtësi.