Frika nga terrorizmi, ia kthen Zvicrës turistët vendorë

Profesori i turizmit në Universitetin e St. Gallenit, Christian Lässer ka thënë se turizmi zviceran aktualisht po përfiton nga fakti se Zvicra ende konsiderohet “vend i sigurt”. Numri i turistëve zviceranë që kanë vizituar Parisin ka rënë për 20%

Zviceranët, nga frika prej situatës së vlerësuar si të  rrezikshme në shumë vende të botës, këtë vit po i kthehen më shumë turizmit në vendin e tyre. Kështu, situatat e krizës në Turqi, Tunizi dhe në Francë, (kryesisht në Paris) kanë bërë që të zvogëlohet numri i turistëve që ia mësyjnë këtyre vendeve, shkruan srf.ch. Kështu, në tremujorin e parë të këtij viti bujtjet e turistëve zviceranë kanë qenë plot 20 për qind më të pakta se në periudhën e njëjtë të një viti më parë, transmeton albinfo.ch.

Sipas nëndrejtorit të organizatës “Schweiz Tourismus” Urs Eberhard, gjatë periudhës së përmendur pikat më të frekuentuara për turistët vendorë kanë qenë Ticino, regjioni i Liqenit të Gjenevës, kantoni Graubünden dhe regjioni Berner Oberland. Ai ka thënë se numri i bujtjeve të regjistruara në janar dhe në maj dëshmon për rritje në krahasim me vitin e kaluar.

Ndërsa profesori i turizmit në Universitetin e St. Gallenit, Christian Lässer ka thënë se turizmi zviceran aktualisht po përfiton nga fakti se Zvicra ende konsiderohet “vend i sigurt”.  Por ai ka kundërshtuar mundësinë që turizmi zviceran të promovojë sigurinë si përparësinë që e veçon Zvicrën nga vendet tjera evropiane, pasi që kjo është një vlerë që nuk mund të garantohet.

Nga ana tjetër, vendet tjera fqinje, përkatësisht regjionet e tyre alpine si Tiroli jugor i Austrisë ose Gjermania kanë shënuar rritje edhe më të madhe të turizmit gjatë periudhës së përmendur.