FSK shpall ushtarin më të mirë për vitin 2019

Burim Ramadani (Facebook)

Forca e Sigurisë së Kosovës ka shpallur Besnik Nebihun si ushtarin më të mirë për vitin 2019.

Në këtë garë që mbahet qysh nga viti 2014, pati pjesëmarrës edhe nga shtetet partnere të Kosovës, shkruan albinfo.ch.

22 pjesëmarrës ishin nga FSK, kurse 18 të tjerë nga ShBA, Britania e Madhe, Kanada, Belgjika, Kroacia, Shqipëria, Polonia, Turqia dhe Maqedonia e Veriut.

Zëvendësministri i Mbrojtjes, Burim Ramadani, tha se po synojnë që të rrisin bashkëpunimin e ndërveprimin ushtarak me shtetet partnere.

“Orientimi dhe përkushtimi ynë është që të rrisim bashkëpunimin dhe ndërveprimin ushtarak me partnerët, me NATO-n. Kjo është e ardhmja jonë e përbashkët. Jam i bindur se kjo garë, tashmë tradicionale, promovon vlerat, gatishmërinë dhe profesionalizmin e FSK-së dhe, po ashtu ndihmon në shkëmbimin të përvojave me ushtarët ndërkombëtarë nga vendet partnere”, ka shkruar ai në Facebook, përcjell albinfo.ch.

Ceremonia e shpalljes së ushtarit më të mirë u mbajt në kazermën “Adem Jashari” në Prishtinë.