Fundjavë: 60 mijë pushues nga Kosova hynë në Shqipëri

Ilustrim

Mbrëmja e kësaj të diele në kufirin Shqipëri-Kosovë u shoqërua me kolona të gjata për hyrje në Kosovë, pavarësisht procedurës pa kontrolle në kufi.

Nga të dhënat e autoriteteve kufitare duket se kjo fundjavë ka shënuar fluksin më të lartë të sezonit veror me mbi 60 mijë pushues nga Kosova dhe mbi 9 mijë automjete të vogla dhe autobusë që kanë hyrë në Shqipëri me destinacion bregdetin, raporton A2, përcjell albinfo.ch.

Muaji korrik poashtu është mbyllur me bilanc pozitiv krahasuar me një vit më parë ku sipas të dhënave nga autoritetet mesatarja javore, gjatë korrikut deri në 50 mijë shtetas të Kosovës, pa llogaritur edhe nga vendet e rajonit kanë hyrë në Shqipëri përmes doganës së Morinit.

Që nga fillimi i sezonit turistik, që përkon me muajin qershor, pika kufitare e Morinit, është përballur me fluks në rritje të hyrje të qytetarëve të Kosovës.