Furnizimi me barna, MSH-ja thotë se janë siguruar 90 % të citostatikëve

Po ashtu bëhet e ditur se edhe në Kardiokirurgji dhe Kardiologji Invazive janë blerë stenta për një periudhë të konsiderueshme kohore

Ministria e Shëndetësisë njofton se bazuar më të dhënat e fundit që ka marrë nga Barnatorja qendrore e Qendrës Klinike Universitare të Kosovës, tashmë ka nisur të përmirësohet furnizimi me barna dhe qytetarët ngadalë do të fillojnë t’i vërejnë ndryshimet.

“MSH-ja ka shpallur 300 artikuj për tenderim nga Lista Esenciale e Barnave, materialit shpenzues dhe citostatikëve, me kontraktimin e të cilave do të krijohet një furnizim stabil për nevojat e qytetarëve, derisa aktualisht furnizimi me barna të Listës Esenciale është ngritur mbi 65 për qind.  Në këtë drejtim, MSH-ja informon se furnizimi me citostatikë tani është rreth 90 për qind, me çka mbulohen pothuajse të gjitha nevojat e qytetarëve, të cilët sfidohen çdo ditë nga këto sëmundje”, thuhet në njoftim.

Po ashtu bëhet e ditur se edhe në Kardiokirurgji dhe Kardiologji Invazive janë blerë stenta për një periudhë të konsiderueshme kohore.

MSH thotë se tashmë ka krijuar një sistem, i cili do të rregullojë njëherë e përgjithmonë furnizimin me barna.