Skip to content

Gazeta zvicerane: Serbi-Shqipëri, ndeshja më e ndezur në botën e futbollit

HAMBURG, GERMANY - JUNE 19: A general view as Qazim Laci of Albania celebrates scoring his team's first goal with teammates during the UEFA EURO 2024 group stage match between Croatia and Albania at Volksparkstadion on June 19, 2024 in Hamburg, Germany. (Photo by Stuart Franklin - UEFA/UEFA via Getty Images) https://fshf.org/sq/euro-2024-shqiperia-barazon-2-2-me-kroacine-ne-stadiumin-volksparkstadion-te-hamburgut/

NZZ: Një ndeshje që mbart histori tensioni dhe simbolikë politike

Kur këtë të shtunë Serbia dhe Shqipëria do të përballen në ndeshjet kualifikuese për Botërorin, masat e sigurisë do të jenë maksimale. Qindra policë, përfshirë snajperë dhe ekspertë të dronëve, do të sigurojnë stadiumin e qytetit të vogël Leskovac, i cili mban vetëm 8 mijë spektatorë, përcjell albinfo.ch.

Tifozët shqiptarë nuk do të kenë sektor të veçantë, pasi biletat nuk janë hedhur në shitje të lirë, një masë parandaluese për të shmangur përsëritjen e incidentit famëkeq të vitit 2014.

Në atë ndeshje, një dron me flamurin e “Shqipërisë së Madhe” fluturoi mbi fushë, duke ndezur përleshje mes lojtarëve dhe tifozëve. Përplasjet vazhduan edhe jashtë stadiumit, në Kosovë, Serbi e diasporë, duke reflektuar tensionet e thella historike midis dy vendeve.

Në qendër të këtij konflikti mbetet Kosova, e pavarësuar në vitin 2008, por ende e mohuar nga Beogradi. Për shumë serbë, ajo mbetet zemra e identitetit kombëtar, ndërsa për shqiptarët është simboli i lirisë dhe i përbashkimit kombëtar.

Këto ndjenja pasqyrohen edhe në tribuna. Ultrasit serbë shpesh valëvisin flamurin e “Serbisë së Madhe” dhe simbolet mesjetare, ndërsa tifozët shqiptarë këndojnë për UÇK-në dhe bashkimin kombëtar. Episodet e tensionuara nuk kanë munguar: lojtari shqiptar Mirlind Daku u pezullua për dy ndeshje pas thirrjes “Fuck Serbia” në Euro 2024, ndërsa Federata Serbe u gjobit për djegien e një flamuri shqiptar.

Megjithatë, ndeshja e parë e këtij cikli eliminator mes dy vendeve në Tiranë përfundoi pa incidente — një zhvillim që UEFA e vlerësoi si sinjal pozitiv. Edhe pse pa tifozë të organizuar, atmosfera u mbajt e qetë, pavarësisht protestave të ultrasve shqiptarë që ndjenë se u përjashtuan nga stadiumi.

Në horizont qëndron një tjetër provë bashkëpunimi: Kampionati Europian U-21 i vitit 2027, që është planifikuar të zhvillohet bashkë nga Serbia dhe Shqipëria.

Turneu, me finalen në Tiranë dhe ndeshjen hapëse në Novi Sad, shihet si një përpjekje për afrimin e dy vendeve — por jo të gjithë e përkrahin. Grupet nacionaliste nga të dyja anët e kanë kundërshtuar ashpër, duke e quajtur “bashkëpunim me armiqtë”.

Në këtë sfond të ndjeshëm, dueli i kësaj fundjave në Leskovac nuk është vetëm një ndeshje futbolli, është një test i qetësisë, maturisë dhe marrëdhënieve shqiptaro-serbe, që prej dekadash luhaten midis rivalitetit historik dhe përpjekjeve për normalizim.