Gjashtë kompani kosovare, pjesë e panairit ‘Green Week’ në Berlin

Ministria e Tregtisë dhe Industrisë, përmes Agjencisë për Investime dhe me Përkrahjen e Ndërmarrjeve në Kosovë, ka organizuar pjesëmarrjen e gjashtë kompanive kosovare në panairin ndërkombëtar “Green Week”që po mbahet në Berlin të Gjermanisë.

“Kompanitë AMO, ESSI, FRUTEX, ELKOS, Hit-Flores, Stonecastle Vineyards&Winery L.L.C, po promovojnë produktet e tyre si: prodhime konditorike, fruta mali, bimë mjekuese dhe aromatike, lëngje frutash, pije alkoolike, energjike, fara të pjekura, etj”.

Endrit Shala, ministër i Tregtisë dhe Industrisë në Kosovë, ka bërë të ditur se në këtë panair vizitorë të shumtë po shprehin interesim në produktet kosovare, duke i degustuar dhe blerë ato, përcjell albinfo.ch.

“Ky panair është mundësi e mirë që kompanitë kosovare të promovojnë produktet e tyre si dhe të krijojnë bashkëpunim me kompanitë e tjera pjesëmarrëse”.

“Panairi ndërkombëtar ‘Green Week’ njihet si një ndër panairet më të rëndësishme të industrisë ushqimore, bujqësisë, në të cilin po marrin pjesë mbi 1700 ekspozues me mbi 100 mijë produkte nga mbarë bota”.