Gjeneva ndan 1 milionë franga për të tërhequr produksionet filmike dhe televizive

Kantoni i Gjenevës synon të shndërrohet në një destinacion më tërheqës për produksionet audiovizive, përmes një skeme të re financiare që mbështet shpenzimet lokale të filmimeve dhe postproduksionit.

Në një mjedis gjithnjë e më konkurrues, Gjeneva synon të forcojë pozicionin e saj si lokacion tërheqës për produksionet e filmave dhe serialeve televizive. Të martën u prezantua programi i ri për nxitjen e prodhimit audioviziv, i cili për vitin 2026 disponon një fond prej 1.05 milionë frangash zvicerane.

Programi bashkon institucionet publike dhe partnerët privatë, si dhe aktorët e ndryshëm të sektorit audioviziv, deklaroi për mediat Delphine Bachmann, përgjegjëse për Departamentin e Ekonomisë, Punësimit dhe Energjisë së Gjenevës.

Nisma ishte paralajmëruar një vit më parë, gjatë Festivalit Ndërkombëtar të Filmit në Locarno.

Bachmann, e cila është përgjegjëse edhe për zhvillimin ekonomik të kantonit, vlerëson se mekanizmi i ri do të forcojë jo vetëm industrinë audiovizive, por edhe atraktivitetin ekonomik të Gjenevës.

Për vitin 2026, fondi financohet me 350 mijë franga nga kantoni, 200 mijë franga nga Qyteti i Gjenevës dhe 500 mijë franga nga burime private, duke arritur gjithsej në 1.05 milionë franga.

“Ky është vetëm një hap i parë”, tha Joëlle Bertossa, këshilltare administrative e Qytetit të Gjenevës. Ajo, e cila për shumë vite ka punuar si producente filmi, shpreson se skema e re do të ndihmojë në rikthimin e produksioneve të mëdha ndërkombëtare në Gjenevë.

Rimbursim deri në 30 për qind të shpenzimeve

Projekti për nxitjen e prodhimit audioviziv është përgatitur për rreth dhjetë vjet. Për realizimin e tij u desh të sigurohej edhe mbështetja e Këshillit të Madh të Gjenevës, i cili në maj e miratoi me shumicë të gjerë dy ligjet e nevojshme.

Një nga argumentet kryesore në favor të skemës ishte ndikimi i saj ekonomik. Sipas vlerësimeve, për çdo frang të investuar mund të krijohet një efekt shumëfishues prej 3.5 deri në 4.5 herë për ekonominë lokale.

Sistemi pritet të bëhet funksional nga muaji shtator. Ngjashëm me skemat që tashmë ekzistojnë në kantone të tjera zvicerane, përfshirë Valaisin, fondi do të funksionojë përmes një mekanizmi të njohur si “cash rebate”, pra rimbursim financiar i një pjese të shpenzimeve.

Produksionet do të mund të marrin rimbursim për shpenzimet e kryera në Gjenevë, veçanërisht për shërbimet dhe produktet e blera nga bizneset lokale, si gjatë xhirimeve ashtu edhe gjatë fazës së postproduksionit.

Në shpenzimet e pranueshme përfshihen, ndër të tjera, pagat e ekipeve të xhirimit, qëndrimet në hotele dhe marrja me qira e pajisjeve teknike.

Rimbursimi mund të arrijë deri në 30 për qind të shpenzimeve, ndërsa kufiri maksimal është 500 mijë franga për një projekt.

Sipas Delphine Bachmann, ky kufi është vendosur qëllimisht në një nivel të lartë, në mënyrë që skema e Gjenevës të dallohet nga programet e ngjashme të kantoneve dhe vendeve të tjera.

---