Gjermani: Zgjidhet mosmarrëveshja për pagat në fabrikën e dönerit, shmanget rritja e çmimeve

Në Gjermani është arritur një marrëveshje historike për pagat në një nga fabrikat më të mëdha të prodhimit të dönerit, duke shmangur kështu frikën për rritje të mëtejshme të çmimit të këtij ushqimi të shpejtë shumë të dashur, shkruan DW, transmeton albinfo.ch.

Pas javësh me greva të ndërprera, punëtorët e kompanisë Birtat Meat World SE në Murr, Baden-Württemberg, kanë rënë dakord me menaxhmentin për një pagë fillestare prej 2,600 euro bruto në muaj. Lajmi u konfirmua nga Sindikata e Ushqimit, Pijeve dhe Cateringut (NGG), e cila ndërmjetësoi marrëveshjen.

Prej vitesh, punëtorët, shumica emigrantë nga Turqia, Rumania dhe Bullgaria, kishin kërkuar paga më të drejta dhe më transparente, pasi pagesat varionin dukshëm për punë të ngjashme.

Fabrika e Birtat është themeluar mbi 30 vite më parë dhe furnizon me mish të ngrirë për döner mijëra pika shitjeje në të gjithë Gjermaninë, duke arritur rreth 13 milionë konsumatorë çdo muaj. Greva e fundit shkaktoi shqetësime të mëdha mes pronarëve të restoranteve dhe konsumatorëve për rritje të mundshme çmimesh.

Negociatorja e sindikatës, Magdalena Krüger, e përshkroi marrëveshjen si “një rezultat historik”, duke theksuar se është hera e parë që një sektor kaq specifik si ai i mishit për döner arrin një marrëveshje të tillë.

Çmimi i një sanduiçi döner në Gjermani është rritur ndjeshëm gjatë dy dekadave të fundit, nga rreth 2.50 euro në më shumë se 7 euro sot, duke mbetur megjithatë një nga ushqimet e shpejta më të përballueshme për konsumatorët me buxhet të kufizuar, transmeton albinfo.ch.