Gjermania, e shqetësuar për situatën në Bosnjë

Gjermani - unsplash - photo by Florian Wehde

Kambanat e alarmit po bien në Berlin për situatën e krijuar në Bosnjë e Hercegovinë, pohuan qarqe qeveritare për DW, që theksuan se po përpiqen me Kuintin të gjejnë një zgjidhje për të penguar përhapjen e konfliktit në rajon.

Gjermania ka ngritur shqetësimin se situata në Bosnjë e Hercegovinë mund të jetë vërtet serioze, teksa përqendrohen në shpërthimin e një konflikti të mundshëm në rajon.

Sipas Deutsche Welle, disa nga qarqet qeveritare të Berlinit pohuan se janë duke negociuar me vendet e Quint-it për të gjetur një zgjidhje në stabilizimin e situatës.

“Jemi të alarmuar pas raportit të paraqitur nga Përfaqësuesi i Lartë (HR), Christian Schmidt, thuhej nga qarqet qeveritare në Berlin. Qeveria Federale ndan shqetësimin e madh të Përfaqësuesit të Lartë Schmidt për situatën e brendshme politike në Bosnjë e Hercegovinë, sidomos për një sërë deklaratash të presidentit serb, Milorad Dodik.

Thirrjet për shkëputje dhe për hapa për dobësimin e shtetit në tërësi janë të papërgjegjshme dhe krejtësisht të papranueshme”, thuhet ndër të tjera në një prononcim të Ministrisë së Punëve të Jashtme të Gjermanisë për DW.