Gjermania i dhuron Kosovës pajisje mjekësore kundër Covid 19

Ministri i Shëndetësisë, Armend Zemaj dhe ambasadori i ri i Gjermanisë në Kosovë, Jorn Rohde, morën pjesë sot në ceremoninë e dorëzimit në Institutin Kombëtar të Shëndetësisë Publike të një kontingjenti të pajisjeve mbrojtëse personale profesionale, dedikuar Shërbimit Spitalor, Klinik dhe Universitar të Kosovës dhe institucioneve shëndetësore si përgjigje kundër COVID-19.

Kontingjenti përmban 17 mijë maska, respirator FFP2 (EN 149)/N95 (NIOSH), 5 mijë e 500 pako me dorëza nitrile të madhësive të ndryshme dhe 3 mijë e 700 litra me dezinfektues, është financuar nga autoritetet e shtetit të Gjermanisë.

Zemaj vlerësoi lart kontributin e shtetit të Gjermanisë dhe të vetë Bashkimit Evropian në asistencën dhënë Kosovës për luftimin e COVID-19, teksa theksoi se Ministria e Shëndetësisë dhe profesionistët shëndetësorë të Kosovës janë mirënjohës për këtë përkrahje, të cilën do ta manifestojnë me angazhim konkret kundër pandemisë korona, përcjell albinfo.ch.

Ndërkaq diplomati gjerman tha se ky është një kontribut nga shteti gjerman për popullin e Kosovës dhe profesionistët shëndetësorë, ndërkohë që këshilloi qytetarët që t’u përmbahen udhëzimeve dhe të zbatojnë masat e Qeverisë për t’u mbrojtur nga koronavirusi.