Gjermania kundër çmimit kufizues për gazin: Do ishte joproduktive

(KEYSTONE/Christian Beutler)

Gjermania është kundër vendosjes së një çmimi kufizues për gazin, ide që ka nisur të tërheqë disa nga vendet anëtare për t’u përballur me rritjen e çmimeve.

Por, duke folur për Euronews, ministrja gjermane për Çështjet Evropiane ka bërë të qartë se kjo do të ishte joproduktive dhe do të trembte furnizuesit.

“Thelbi i kësaj çështjeje është, nëse vendosim një çmim kufizues si BE dhe të gjithë konsumatorët në mbarë botën refuzojnë ta bëjnë, atëherë gazi do të shkojë tek konsumatorët e tjerë dhe rrjedhimisht mund të kemi një rënie të rezervave me gaz, ose rënie të furnizimeve. Ndaj mendoj se duhet të bëjmë kujdes”, tha Anna Luehrmann.

Sipas Berlinit, Bashkimi Evropian duhet të diversifikojë strukturën e furnizimit dhe të angazhohet në negociata direkte me furnizuesit e gazit për të siguruar çmime të ulëta.

“Mendoj se është e rëndësishme ta diskutjmë këtë me furnizuesit individualë të gazit, si për shembull me Norvegjinë, për të gjetur rrugën e uljes së çmimit, pasi edhe ata vetë kanë interes në tregun evropian”, theksoi ajo.

Së dyti, ministrja gjermane ka mbrojtur paketën e masave të miratuara nga Komisioni Evropian, përfshirë reduktimin e kërkesës për elektricitet dhe taksimin e fitimeve shtesë të kompanive të energjisë.

“Përfitimet shtesë të kompanive të energjisë janë të nevojshme, në mënyrë që ne t’i përdorim ato teprica që nuk kanë ardhur si pasojë e sforcimit të kompanive. Meqë ra fjala, tregu i energjisë është strukturuar në atë mënyrë që ne t’i përdorim këto teprica dhe t’ua japim konsumatorëve, sidomos atyre në nevojë dhe të ulim çmimet për ta”, sipas saj.

Intervista u realizua në kuadër të Këshillit të Çështjeve të Përgjithshme, ku ministrat evropianë folën edhe për mundësinë e shmangies së rregullit të unanimitetit kur bëhet fjalë për politikën e jashtme dhe sigurinë.

Ministrja gjermane theksoi se kjo duhet bërë sa më parë dhe përpara se vende të tjera të bashkohen me bllokun./Euronews