Gjermania me porosi për Kosovën e Serbinë për arrestimet e Popoviqit e Spahiut

@unsplash

Ministri gjerman i Shtetit, Gunther Krichbaum, ka deklaruar se Gjermania po i monitoron nga afër arrestimet e shqiptarëve në Serbi dhe atë të Igor Popoviqit në Kosovë.

Ai u ka bërë të dyja vendeve disa kërkesa, pas takimit me emisarin e Bashkimit Evropian për dialogun Kosovë-Serbi, Peter Sorensen.

“Ne vazhdojmë ta monitorojmë nga afër arrestimin e ndihmësdrejtorit të Zyrës për Kosovën në qeverinë e Serbisë. Çdo masë e heqjes së lirisë duhet të jetë e justifikuar dhe proporcionale. Po ashtu po e monitorojmë nga afër arrestimin e shtetasit kosovar Arbnor Spahiu nga autoritetet serbe dhe presim që Serbia të sigurojë plotësisht dhe shpejt zbatimin e procedurave ligjore, të respektojë të drejtat themelore dhe të garantojë proces të drejtë ligjor, në përputhje me Marrëveshjen e Dialogut për drejtësinë që thotë se procedurat penale për veprat në Kosovë duhet të zhvillohen në parim në Kosovë”, thuhet në komunikatë, transmeton albinfo.ch.

Sipas tij, Gjermania e mbështet dialogun mes Kosovës dhe Serbisë dhe u ka bërë thirrje qeverive të tyre t’i zbatojnë të gjitha marrëveshjet e arritura deri tash dhe “të përmbahen nga deklarata apo veprime përshkallëzuese”.

“U bëj thirrje të dyja shteteve që të rikthejnë angazhimin e plotë në procesin e dialogut. Kjo përfshin mundësimin e lëvizjes së lirë dhe të sigurt, po ashtu për negocitatorët dhe ekipet e tyre, si dhe një përmbajtje të kujdesshme në deklaratat publike, duke pasur parasysh mandatet përkatëse. Gjermania është e gatshme të mbështesë të dy shtetet në avancimin e një procesi të qëndrueshëm, gjithëpërfshirës dhe paqësor të normalizimit”, thuhet në komunikatë.

Ai u shpreh se Gjermania e sheh Ballkanin Perëndimor në Bashkimin Evropian dhe se për këtë normalizimi i marrëdhënieve mes Kosovës dhe Serbisë është thelbësor ndërsa tha se të dyja palët duhet të zbatojnë standardet dhe vlerat evropiane.