Gjermania subvencionon për harxhime të derivateve

Lehtësimet për udhëtarët me makina

Shteti gjerman ka lansuar një pako të ndihmave për qytetarët e saj për shkak të  rritjes së madhe të çmimeve, kostove për ngrohje, si dhe një inflacion tepër i lartë. Bundestagu gjerman ka vendosur të ndihmojë gati të gjitha kategoritë e qytetarëve, njofton albinfo.ch.

Në pakon e miratuar më 12 maj në Bundestag të Gjermanisë thuhet se rritja e kostove të karburanteve ka prekur shumë njerëz që duhet të udhëtojnë në largësi të mëdha deri në vendet e punës.

Lidhur me këtë temë, Bundestagu vendosi që për çdo kilometër të kaluar të paguhet një ndihmë paushale prej 38 centë për kilometër.

Ky lehtësim vlen për të gjithë ata që deri në vendin e punës duhet të udhëtojnë 21 kilometra e më shumë, e ai do të vlejë prej datës 1 janar 2022, gjë që do të thotë se këta persona do të marrin para edhe për muajt e kaluar.

Deri tani ndihma paushalle për një kilometër të kaluar ka qenë 35 centë. Mirëpo, kjo ndihmë nuk do të merret menjëherë, por ajo do të llogaritet në deklarimin tatimor për vitin 2022. /Albinfo.ch

---