Gjykata Federale jep vendimin: I mirintegruari mund të qëndrojë në Zvicër

Një argjentinas, i cili jetonte prej dhjetë vjetësh në Zvicër, mund të qëndrojë në Zvicër. Kështu ka vendosur në mënyrë të pazakontë Gjykata Federale, pasi personi vinte nga shtetet e treta dhe nuk kishte leje qëndrimi, shkruan srf.ch.

Keystone

“Është në interesin ekonomik të vendit që persona të mirintegruar t’i mbajmë këtu”, thuhet në arsyetimin e Gjykatës, përcjell albinfo.ch.
Më konkretisht, bëhet fjalë për një argjentinas 41-vjeçar, i cili është martuar me një grua gjermane më 2004 dhe më pas u zhvendosën në Zvicër. Ai mori një leje qëndrimi, por më 2008 çifti u divorcua dhe Zyra Federale për Emigracion ia hoqi të drejtën e lejeqëndrimit.

Për të mos mbaruar këtu historia, ai gjeti më pas një të dashur zvicerane, por edhe kjo përfundoi shpejt. Pasi 41-vjeçari nuk dëshironte të lëshonte Zvicrën, vendosi çështjen ta dërgojë në Gjykatë, për të shmangur dëbimin.

Gjykata Rajonale në Cyrih nuk mori parasysh kërkesën e argjentinasit, por Gjykata Federale në Lausanë e korrigjoi atë me arsyetimin se “Zvicra ka interesa legjitime për të kontrolluar emigracionin, megjithatë kjo nuk vlen për personat të cilët kanë qëndruar rreth dhjetë vjet në Zvicër dhe janë të mirintegruar”.

Firmat zvicerane nuk kanë pse të humbin një punëtor të zellshëm dhe të kualifikuar, përcjell albinfo.ch. 41-vjeçari gjithashtu nuk ishte dënuar asnjëherë dhe kurrë nuk kishte përdorur ndihmën sociale.

Deri më tani Gjykata e Lausanës kishte parë vetëm pak raste pozitive si ky i lartpërmenduri. Me këtë vendim mund të gëzohen edhe shumë shqiptarë të diasporës, të cilët jetojnë prej vitesh në vendin helvet – mjaftojnë të moskeqpërdorin ndihmën sociale dhe të shmangin krimet.