A do të konfirmohen apo refuzohen aktakuzat kundër Thaçit e Veselit

Nesër është afati i fundit kur Gjykata Speciale duhet t'i konfirmojë ose t'i refuzojë aktakuzat kundër presidentit Thaçi dhe Kadri Veselit

Avokati Arianit Koci ka thënë se nesër para orës 24:00 Gjykata Speciale duhet të konfirmojë se aktakuza ndaj presidentit Hashim Thaçi dhe kryetarit të PDK-së, Kadri Veseli, është hedhur poshtë, në të kundërt i bie që ajo është konfirmuar së paku pjesërisht.

“Rregulla 85, pika 5 në mënyrë eksplicite parasheh që gjykata të marrë vendim jo më larg se 6 muaj. Nesër pra është afati i fundit që gjyqtari të marrë vendim. Është e qartë kjo dispozitë ligjore”, ka thënë Koci në t7, përcjell Albinfo.ch.

“Janë dy mundësi. Nëse hedhet aktakuza, përfundon procedura ndaj të dyshuarve. Personat që janë të përfshirë janë të dyshuar. Nëse hedhet nesër është afati që të informojnë. Nëse konfirmohet aktakuza, apo pjesërisht në ndonjë pikë, atëherë ata mund të fshehin faktin që është konfirmuar aktakuza deri në momentin kur i kumtohet të dyshuarve në gjyq”, thotë ai.

“Sipas vlerësimit tim, aktakuza është konfirmuar së paku pjesërisht. Patjetër duhet të informohen nesër nëse është hedhur aktakuzë, përndryshe shkelen të drejtat e të dyshuarve”, shtoi ai.

---