Gjysma e agjencive të udhëtimit do të mbyllen, 4000 vende pune në rrezik

Këtë prognozë pesimiste e ka dhënë kryetari i Shoqatës Zvicerane të Udhëtimeve, Max E. Katz, në intervistën e tij për "NZZ am Sonntag"

Rreth gjysma e të gjitha agjencive të udhëtimit në Zvicër do të duhet të mbyllen nëse nuk do të ketë së shpejti ndonjë ndihmë thelbësore nga shteti.

Këtë prognozë pesimiste e ka dhënë kryetari i Shoqatës Zvicerane të Udhëtimeve, Max E. Katz, në intervistën e tij për “NZZ am Sonntag”.

Situata është dramatike. Agjentët e udhëtimit duhet të rimbursojnë praktikisht të gjitha udhëtimet e shitura për këtë vit, që nga tetori i vitit 2019, transmeton albinfo.ch. Pothuajse asnjë udhëtim i ri nuk është prenotuar. Për pasojë, 4000 vende pune janë në rrezik.

Tani, shoqata  shpreson që Qeveria Federale, ashtu siç është vepruar në Gjermani dhe Austri, të marrë 100 përqind të kostove fikse të agjencive të udhëtimit.

Reduktimi do t’i godiste veçanërisht shumë gratë. “83 për qind e punonjësve të kësaj dege, janë gra”, ka thënë Katz.

Industria e udhëtimeve përbëhet nga gjithsej 1.300 agjensi udhëtimi. 88 përqind e tyre janë NVM (Ndërmarrje të Vogla e të Mesme) të menaxhuara nga pronarët, përcjell albinfo.ch.

“Këta pronarë dhe partnerët e tyre, të cilët shpesh punojnë në të njëjtën kompani, nuk kanë marrë ndonjë kompensim të të ardhurave që nga 1 qershori, kështu që ata nuk kanë të ardhura”.

Të Mërkurën, Këshilli Federal pritet të vendosë për ndihmë shtesë për industrinë e udhëtimeve.

---