Gordon: Kosova është shtet stabil, i pavarur dhe shumetnik

Gjatë vizitës në Bosnje dhe Hercegovinë, Hoxhaj takohet me ndihmëssekretarin amerikan të Shtetit për Evropë dhe Euroazi, Philip Gordon

Ministri Hoxhaj ka falënderuar zyrtarin e lartë amerikan për kontributin e jashtëzakonshëm që administrata amerikane po jep për konsolidimin e shtetësisë së Kosovës dhe forcimin e subjektivitetit ndërkombëtar të saj.

  Hoxhaj dhe Gordon kanë diskutuar për proceset e veçanta ndërkombëtare rreth Kosovës, dhe ndihmën e gjithanshme që SHBA-të po japin në drejtim të përmbylljes së suksesshme të tyre, duke filluar që nga procesi i njohjeve, anëtarësimi në organizatat ndërkombëtare, por edhe proceset integruese të Kosovës në strukturat euroatlantike. 

Gordon ka siguruar ministrin Hoxhaj se SHBA-të do të vazhdojnë ndihmën e pakursyer për popullin e Kosovës. 

“Kosova është shtet stabil, i pavarur dhe shumetnik, dhe dialogu teknik duhet t’i zvogëlojë diferencat në mes të Kosovës dhe Serbisë”, ka thënë Gordon, njoftoi Ministria e Punëve të Jashtme e Kosovë.  Po ashtu ministri Hoxhaj ka zhvilluar një takim edhe me shefin e diplomacisë boshnjake Sven Alkalaj. Gjatë takimit, ministri i Jashtëm i Kosovës e ka informuar homologun boshnjak për procesin e shtetndërtimit, reformat e brendshme, konsolidimin e gjithanshëm të shtetësisë dhe proceset e pritura të anëtarësimit të Kosovës në organizatat ndërkombëtare. Hoxhaj i ka parashtruar ministrit Alkalaj kërkesën për njohjen e pavarësisë së Kosovës nga Bosnja dhe Hercegovina. 

Po ashtu, Hoxhaj ka kërkuar nga Qeveria boshnjake të pranojë dokumentet e udhëtimit të Republikës së Kosovës, gjë që do të mundësonte lëvizjen e lirë të kosovarëve në Bosnje dhe Hercegovinë.