Grubi reagon pas vrasjes së 14-vjeçares: Tendenca për dimension etnik, krim i dyfishtë

Artan Grubi, Facebook

Zëvendëskryeministri i parë i Maqedonisë së Veriut, Artan Grubi, i ka shprehur ngushëllime familjes së 14-vjeçares, Vanja Gjorçevska, e cila u gjet e vrarë një javë pasi ishte raportuar si e zhdukur.

”I tmerruar nga rrëmbimi dhe vrasja e 14-vjeçares, Vanja Gjorçevska. Shpreh ngushëllimet më të sinqerta familjarëve dhe të afërmve të viktimës. Ministria e Punëve të Brendshme dhe Prokuroria kanë punuar intenzivisht për ta zbardhur rastin që tronditi gjithë shoqërinë, duke sjellë para drejtësisë autorët e dyshuar të këtij krimi makabër”, ka shkruar ai në Facebook, përcjell albinfo.ch.

Ai thotë se tendenca që t’i japin dimension etnik, përbën krim të dyfishtë.

“Individë të caktuar në rrjete sociale po përpiqen t’i japin dimension etnik këtij krimi dhe kjo tendencë paraqet krim të dyfishtë. Familja dhe e gjithë shoqëria janë në dhimbje dhe mosbesim, ndaj dhimbjen me të gjithë, ndërsa bashkërisht duhet t’i shporrim nga mesi ynë vrasësit, komplotistët dhe nxitësit”, ka thënë ai.