Hakerët marrin të dhënat personale të policëve të Bernës

Një e metë sigurie në një aplikacion të përdorur nga policia e Bernës ka çuar në një rrjedhje të madhe të të dhënave. Hakerët arritën të kapnin identitetin dhe numrat e telefonit të të gjithë 2800 punonjësve të policisë kantonale.

“Ka pasur një rrjedhje të dhënash”, tha zëdhënësja e policisë së Bernës, Flurina Schenk, për televizionin gjerman SRF të premten, përcjell albinfo.ch.

E meta kishte të bënte me një aplikacion për telefonat inteligjentë dhe prek të gjithë punonjësit e pajisur me këtë lloj pajisjeje, pra të gjithë personelin.

Ata rrezikojnë të jenë objektiv i hakerëve dhe janë paralajmëruar për rreziqet e përfshira, tha policia.

Qendra Kombëtare për Sigurinë Kibernetike (NCSC) informoi policinë e Bernës më 21 korrik për shkeljen e sigurisë në aplikacionin “MobileIron”. Problemi u zgjidh shpejt, por informacioni kishte rrjedhur tashmë, përcjell albinfo.ch.

“MobileIron” është një aplikacion i përdorur në mbarë botën që lejon punonjësit e pajisur me laptopët e tyre në terren të lidhen me serverin e punëdhënësit.

Policia e Bernës thotë se nuk e ka idenë se kush i ka vjedhur të dhënat dhe nuk ka asnjë indikacion deri më sot që të dhënat janë publikuar në internet, shkruan RTS.