Haradinaj anuloi takimin me ambasadorët e NATO-s për shkak të kushtëzimeve nga Spanja

Kryeministri kosovar nuk ka pranuar kushtet e vendosura nga ambasadori spanjoll në Aleancën Veri-atlantike që Ramush Haradinaj të mos prezantohej si Shef i Qeverisë

Kryeministri Ramush Haradinaj e ka refuzuar, të premten, një takim e pastaj edhe një konferencë të përbashkët me zyrtarët e lartë në NATO’s, në Selinë e KFOR’it, në Prishtinë. Kjo ka ndodhur pasi Kryeministri kosovar nuk ka pranuar kushtet e vendosura nga ambasadori spanjoll në Aleancën Veri-atlantike që Ramush Haradinaj të mos prezantohej si Shef i Qeverisë, shkruan albinfo.ch.

Po ashtu diplomati spanjoll kishte kërkuar që zyrtarët e FSK’së të mos ishin të uniformuar në takim. Express sjell detajet.

Pikërisht në ditën kur Spanja u përballë me pavarësinë e Katalonjës, një përfaqësues i Spanjës, më saktësisht ambasadori spanjoll në NATO ka tentuar të shpërfillë pavarësinë e Kosovës në bazën e KFOR’it në Dragodan të Prishtinë. Ai ka vënë kushte se si të prezantohen institucionet e Kosovës në takimin me ambasadorët e NATO’s.

Ambasadori spanjoll kishte kërkuar që asnjë zyrtar i Shtetit të Kosovës të mos prezantohen në takim me funksionet që ushtrojnë. Kishte kërkuar që Ramush Haradinaj të mos prezantohej si Kryeministri. Veç kësaj, kishte kërkuar që ministri i FSK’së të prezantohet pa titullin e Ministrit dhe Zëvendëskomandanti i FSK’së pa uniformë pasi Spanja nuk e njeh pavarësinë e Kosovës e rrjedhimisht as statusin zyrtar të këtyre personaliteve.