Haradinaj: Arrestimi i Gjuriqit ishte i pashmangshëm

Haradinaj ka thënë se e kanë lutur Gjuriqin që të presë vendim prej 72 orësh për të mos u futur në Kosovë, por ai nuk ka dashur të dëgjojë

Pas mbledhjes së Këshillit të Sigurisë së Kosovës, kryeministri Ramush Haradinaj ka thënë se arrestimi i Gjuriqit nuk ka qenë i këndshëm, por ishte i pashmangshëm dhe duhet të veprohet njësoj edhe në të ardhmen.

Ai ka thënë se veprimi i djeshëm nuk ishte i drejtuar kundër qytetarëve serbë, e as zyrtarëve serbë të institucioneve, por kundër atyre që shkelën ligjin. Haradinaj ka thënë se e kanë lutur Gjuriqin që të presë vendim prej 72 orësh për të mos u futur në Kosovë, por ai nuk ka dashur të dëgjojë.

Haradinaj ka thënë se vendimi i Listës serbe për të dalë nga ekzekutivi është i ngutshëm dhe ka thënë se nuk do të japë dorëheqje, pasi tash nuk e ka shumicën në Kuvend. “Nuk ka zgjedhje dhe dorëheqje s’kam plan të jap”, theksoi Haradinaj. Ai ka deklaruar se Kosova është e hapur për të vazhduar dialogun, për të cilin ka thënë se nuk ka opsion tjetër.