Haradinaj nuk mund të aterrojë në Prishtinë, niset nga Sofja me veturë

Për shkak të kushteve të vështira atmosferike, kryeministri i Kosovës, Ramush Haradinaj dhe ekipi i tij nuk ka mundur të aterrojë sot pasdite në Prishtinë, raporton “KTV”.

Fluturimi W67792 i WizzAir nuk ka mundur të aterrojë në Prishtinë as pas tri tentimesh, dhe përfundimisht ka aterruar në Sofje të Bullgarisë, mëson KTV-ja, përcjell albinfo.ch.

Nga aty pritet që kryeministri i Kosovës të vazhdojë për Shkup, para ardhjes në Prishtinë. “Indeksonline” gjithashtu raporton se Haradinaj do të udhëtojë me veturë nga Sofja në mënyrë që të arrijë në Prishtinë.

Haradinaj ishte në Londër për takimin e BERZH-it me kryeministrat e rajonit.

Nesër është një ditë e rëndësishme pasi në Kuvendin e Kosovës do të diskutohet për demarkacionin dhe pritet të hidhet edhe në votim.

Ishte Lidhja Demokratike e Kosovës që ka kërkuar që në seancë të jetë edhe kryeministri Haradinaj.

https://video.gjirafa.com/koha?video=kryeministri-haradinaj-nuk-mund-te-aterroje-ne-prishtine