Haradinaj shprehet se dialogu kishte dal jashtë binarëve

Kryeministri i Kosovës, Ramush Haradinaj iu kundërpërgjigj përfaqësueses së lartë të Bashkimit Evropian për Politikën e Jashtme dhe Sigurinë, Federica Mogherini, e cila apeloi sërish për heqjen e taksës për produktet serbe.

Ajo deklaroi se ditën që do të hiqet taksa, do të ftojë një takim të ri për dialogun e që do të sillte një marrëveshje mes Prishtinës e Beogradit.

Mirëpo, kryeministri Haradinaj, përmes Twitter-it, ka thënë se dialogu nuk duhet të lidhet me taksën pasi edhe bisedimet kishin dalë jashtë binarëve përpara se të vendoseshin këto masa të shtetit kosovar, përcjell albinfo.ch.

“Mungesa e transparencës, inkurajimi i propozimit të shkëmbimit të territoreve dhe moszbatimi i marrëveshjeve ekzistuese, këto janë arsyet. Dialogu mundet dhe duhet të vazhdojë pa e lidhur atë me taksën”, shkroi Haradinaj në rrjetet sociale.