Haradinaj sonte në Bruksel, takime joformale me gjashtëshen e Ballkanit

Haradinaj do të ketë takim bilateral me Mogherinin, ndërkohë që me homologë nga rajoni do t’i diskutojë në mënyrë të hapur të gjitha temat që kanë të bëjnë me perspektiven evropiane të Kosovës

Kryeministri i Kosovës, Ramush Haradinaj, merr pjesë sonte në takimin joformal të gjashtëshes së Ballkanit Perëndimor të ftuar nga Përfaqësuesja e Lartë për Punë të Jashtme dhe Politika të Sigurisë, Federica Mogherini. Haradinaj do të ketë takim bilateral me Mogherinin, ndërkohë që me homologë nga rajoni do t’i diskutojë në mënyrë të hapur të gjitha temat që kanë të bëjnë me perspektiven evropiane të Kosovës.

Kryeministri Haradinaj e vlerëson të pakthyeshëm procesin e integrimit të Kosovës në BE.

Në takimin e tretë të këtij niveli, përfaqësuesja e Lartë dhe kryeministrat do të diskutojnë zhvillimet aktuale në Ballkanin Perëndimor dhe perspektiven për vitin 2018, një vit që do t’u ofrojë partnerëve në rajon një mundësi unike për të përparuar në rrugën e integrimit në Bashkimin Evropian. Ky është takimi i dytë i kryeministrit kosovar me përfaqësuesen e BE-së, Mogherini.