Haradinaj thotë se do t’ua kthejë dinjitetin mjekëve

Kryeministri i Kosovës, Ramush Hardinaj, ka thënë se Qeveria e Kosovës do t’ia kthejë integritetin sistemit të shëndetësisë, duke ngritur cilësinë e shërbimeve shëndetësore.

Në takimin që ka pasur me përfaqësuesit e institucioneve shëndetësore dhe të komunitetit të mjekëve, ai ka thënë se janë mobilizuar për paga të dinjitetshme, ndërtimin e infrastrukturës së nevojshme dhe avancimin e ligjeve në këtë fushë, përcjell albinfo.ch.

“Mjekët janë heronjtë e Kosovës dhe e kemi detyrë t’ua kthejmë dinjitetin”, ka thënë Haradinaj.

Ministri i Shëndetësisë, Uran Ismaili, përmendi zotimet për shtimin e investimeve në infrastrukturë, shtim të resurseve dhe pagave, si dhe sistemin e ri të blerjes së barnave.

E, u.d. i drejtorit të Përgjithshëm të Shërbimit Spitalor dhe Klinik Universitar të Kosovës, Basri Sejdiu, tregoi hapat konkretë që janë ndërmarrë për ofrimin e shërbimeve 24 orë në disa sektorë, përfshirë edhe Institutin Onkologjik, zvogëlimin e listës së pritjeve për barna, koordinimin e spitaleve regjionale dhe programet për trajnimin e stafit të infermierisë dhe mjekëve.