Hetuesit italianë marrin qasje në dosjen e tragjedisë në Crans-Montana

Prokuroria e Romës intensifikon hetimet për zjarrin tragjik të Vitit të Ri ku humbën jetën dhjetëra persona.

Gjashtë hetues nga Prokuroria e Romës mbërrijnë këtë të mërkurë në kantonin Valais, ku do të kenë qasje në dokumentacionin hetimor lidhur me tragjedinë e zjarrit në Crans-Montana, e ndodhur në ditën e Vitit të Ri, përcjell albinfo.ch.

Sipas autoriteteve, hetuesit italianë do të shqyrtojnë dosjen voluminoze që lidhet me ngjarjen tragjike në barin Le Constellation, ku humbën jetën 41 persona dhe u plagosën 115 të tjerë.

Mes viktimave dhe të lënduarve ndodhen edhe shtetas italianë, përfshirë gjashtë viktima dhe disa persona të plagosur.

“Grupi hetimor i Prokurorisë së Romës, i shoqëruar nga një përkthyes, do të ketë qasje në të gjitha dokumentet e dosjes, e cila përmban disa mijëra faqe”, deklaroi prokurorja e përgjithshme e kantonit Valais, Beatrice Pilloud.

Ky hap pritet të ndihmojë në zbardhjen e plotë të rrethanave të kësaj tragjedie që tronditi opinionin publik./Albinfo.ch

---