Holanda kërkon zyrtarisht vizat për shqiptarët

Gjithashtu qartësohet edhe se deri në një vendim të dytë, politika e vizave për shtetasit shqiptarë do të mbetet e njëjtë

Holanda dorëzoi sot zyrtarisht në Komisionin Evropian draft rezolutën e miratuar pak kohë më parë në parlament, përmes të cilët kërkohet rikthimi i regjimit të vizave për shqiptarët.

Në letrën drejtuar komisionerit të emigracionit dhe punëve te jashtme, Dimitris Avramopulos, pretendohet me shkrim që Komisioni Evropian të marrë në konsideratë pezullimin e vizave për shtetasit shqiptarë.

Në mesin e muajit prill, Parlamenti holandez votoi pro në favor të këtij propozimi dhe argumenti i dhënë për një lëvizje të tillë, ishte kriminaliteti i shtuar shqiptar në këtë vend, transmeton TCH.

Ishte pikërisht ai votim që i hapi rrugën qeverisë holandeze t’i drejtohej Brukselit, pasi fjalën e fundit për këtë kërkesë në rikthimin e vizave e ka Bashkimi Evropian, përcjell albinfo.ch.

Ishin pesë parti politike në Holandë që kërkuan votim në Parlament për rikthimin e vizave për Shqipërinë, ndërsa ministri i Jashtëm, Stef Blok këmbëngulte përpara ligjvënësve se ashpërsimi regjimit të vizave është i pavend dhe se do të komplikonte marrëdhëniet me Shqipërinë.

Top Channel i kërkoi një reagim ambasadës së Mbretërisë së Holandës pas letrës që qeveria holandeze i nisi Komisionit Evropian për rikthimin e vizave shtetasve shqiptarë. Në reagimin e saj, ajo shpjegon se me këtë letër, Komisionit i kërkohet të shqyrtojë informacionin e dërguar nga Holanda dhe në konsultim me vendet anëtare të vendosë në lidhje me nevojën për të vepruar.

Më tej ambasada holandeze sqaron se tashmë i takon Komisionit Evropian që të vlerësojë nëse do të ketë nevojë për të ndërmarrë veprim, e të informojë Parlamentin Evropian dhe Këshillin Evropian mbi rezultatet e këtij vlerësimi.

Gjithashtu qartësohet edhe se deri në një vendim të dytë, politika e vizave për shtetasit shqiptarë do të mbetet e njëjtë: qytetarët shqiptarë mbajtës të një pasaporte biometrike nuk kanë nevojë për viza për të udhëtuar në zonën Shengen për maksimumi 90 ditë brenda një periudhe prej 180 ditësh.

---