Homazhe për dëshmorët Ilir Konushevci dhe Hazir Malaj

Në hollin e Kuvendit të Kosovës janë bërë  homazhe  pranë arkivoleve të heroit Ilir Konushevci dhe dëshmorit Hazir Malaj.

Krerët e institucioneve dhe partive politike e qytetarë të shumë kanë nderuar heronjtë.  “Ilir vëlla, bashkë me Hazirin, atdheu dhe kombi të nderon përjetë”, shkroi kryeministri i Kosovës, Ramush Haradinaj në librin e zisë. Ndërsa në akademinë përkujtimore kryeministri ka thënë se është ditë e ndjeshme për kombin, përcjell albinfo.ch.

“Dëshira ime është që porositë e tyre të jetojnë me brezat, me fëmijët dhe ne të punojmë që të jemi të bashkuar, ashtu si ishte vështirë për të ardhur te liria, vështirë është edhe për ta ruajtur lirinë”, ka thënë ai.

Eshtrat e Ilir Konushevcit deri më tani preheshin në varrezat e Tiranës, ndërsa nga sot  do të jenë në mesin e dëshmorëve dhe bashkëluftëtarëve të tij në Prishtinë, ditë kjo që përkon me festën e flamurit.

Ish-pjesëtarët e Ushtrisë Çlirimtare të Kosovës, Konushevci dhe Malaj, janë vrarë më 9 maj të vitit 1998 në një pritë në fshatin Miliskajë të Bajram Currit në Shqipëri.