Hoti: Diplomacia e komprometuar e shtetit të Kosovës

Shefi i Grupit Parlamentar të LDK-së, Avdullah Hoti, sërish ka zgjedhur rrjetet sociale për të akuzuar ekzekutivin e vendit.

Kësaj radhe Hoti ka pasur kritika të mëdha lidhur me mënyrën si po drejtohet diplomacia e vendit. Hoti ka thënë se tani aktivitet kryesor i diplomacisë kosovare është parandalimi i tërheqjeve të njohjeve, përcjell albinfo.ch.

“Politika e jashtme e Kosovës ka kaluar në defansivë dhe është reduktuar në aktivitete për përmirësimin e imazhit të Thaçit. Krejt shërbimi diplomatik i Kosovës është vënë në funksion të përmirësimit të imazhit të tij personal. Televizioni publik RTK veç sa nuk ka hapur një kanal të veçantë për aktivitetet e Thaçit. Disa vende kanë dhënë shenja se do ta rishqyrtojnë njohjen e Kosovës. Nuk bëhet fjalë për njohje të reja. Sukses sot i diplomacisë kosovare konsiderohet parandalimi i tërheqjeve të njohjeve.

“Ministri i Jashtëm përflitet për pjesëmarrje në borde të ndryshme krahas personaliteteve të dyshimta ruse”, ka shkruar Hoti.

Ai ka thënë se komprometimi më tutje i shtetit të Kosovës duhet të ndalet sa më parë, e po ashtu ka kërkuar që diplomacia e Kosovës të kthehet në funksion të shtetit.