I nxehti vazhdon të ‘godasë’ Evropën

(KEYSTONE/Georgios Kefalas)

Vala ekstreme e të nxehtit, e cila po vazhdon prej 11 ditësh radhazi, po godet Evropën Qendrore dhe Veriore, duke sjellë temperatura rekord dhe pasoja tragjike.

Shërbimi meteorologjik francez, Météo-France, parashikon që alarmi i kuq për temperaturat ekstreme të hiqet mbrëmjen e së dielës, pas një rënieje graduale të temperaturave. Megjithatë, 37 departamente në Francë mbeten ende në nivelin më të lartë të alarmit.

Ndërkohë, vala e të nxehtit ka marrë jetë njerëzish. Një foshnjë 18-muajshe humbi jetën pasi u gjet në gjendje kritike brenda një makine të parkuar në parkingun e një spitali universitar në Marsejë. Sipas autoriteteve, fëmija u transportua me urgjencë në spital, por nuk arriti të mbijetojë, transmeton albinfo.ch.

Po ashtu, dy fëmijë, të moshës 2 dhe 4 vjeç, u gjetën të pajetë të hënën në makinën e familjes, të parkuar në një kompleks banimi në jug të Francës. Një tjetër fëmijë, 3 vjeç, humbi jetën të mërkurën pasi u la vetëm në një automjet gjatë temperaturave përvëluese.

Temperaturat e larta kanë ndikuar edhe në sektorin energjetik. Për shkak të kushteve ekstreme atmosferike, tre reaktorë u detyruan të ndërpresin përkohësisht funksionimin, duke sjellë ulje të prodhimit të energjisë elektrike.

Autoritetet vijojnë t’u bëjnë thirrje qytetarëve të shmangin ekspozimin në diell gjatë orëve më të nxehta të ditës dhe të mos lënë kurrë fëmijë apo kafshë të mbyllura në automjete, qoftë edhe për pak minuta.