Protesta është shoqëruar me tensione të larta në bulevardin kryesor të Tiranës, ku protestuesit dhe forcat e rendit janë përballur në disa momente. Policia ka ndërhyrë me gaz lotsjellës, ndërsa në disa zona janë parë flakë dhe tym.
Sipas raportimeve të Top Channel, gjatë protestës janë regjistruar incidente pranë disa institucioneve shtetërore, përfshirë Gjykatën e Lartë, ku është raportuar për zjarrvënie, përcjell albinfo.ch.
Gjatë përplasjeve janë raportuar edhe persona të lënduar, ndërsa situata ka kërkuar ndërhyrjen e forcave policore për të kontrolluar tensionet. Pamjet e publikuara nga vendngjarja tregojnë zjarre në hapësira publike dhe prani të shtuar të policisë.
Protestat e ditëve të fundit janë shoqëruar me incidente dhe përplasje të vazhdueshme, duke rritur shqetësimet për sigurinë publike dhe dëmet materiale në kryeqytet.
Autoritetet pritet të sqarojnë bilancin e plotë të personave të lënduar, dëmet e shkaktuara dhe masat e ndërmarra ndaj personave të përfshirë në incidentet e dhunshme.
