ICO në përkrahje të veprimit të Qeverisë në veri

Edhe ambasadori i Francës në Kosovë, Jean-Francois Fitou është vënë në mbështetje të aksionit të qeverisë së Kosovës në veri

Mbikëqyrësi i pavarësisë së vendit, Zyra Civile Ndërkombëtare, nëpërmjet zëdhënësit, Andy Mecguffy ka thënë se sikur çdo vend sovran, Qeveria ka të drejtë të ndërmarrë hapa për të siguruar administrim adekuat, përfshirë këtu kontrollin e kufirit dhe të doganave.

Siç njofton RTK, ICO ka deklaruar se inkurajon Qeverinë që përpjekjet e veta për të vendosur kontroll në tërë territorin e saj t’i përcjellë me përpjekje për t’i siguruar dhe mbështetur qytetarët e saj në veri të vendit.

Po ashtu edhe ambasadori i Francës në Kosovë, Jean-Francois Fitou është vënë në mbështetje të aksionit të qeverisë së Kosovës në veri. “Nuk duhet pritur që EULEX-i të zbatojë vendimet e Qeverisë së Kosovës. Qeveria e Kosovës ka marrë në duart e veta përgjegjësinë që i takon, prandaj ne duhet ta respektojmë na pëlqeu ose jo”. Kështu ka deklaruar për Radio Dukagjinin, ambasadori francez, Jean-Francois Fitou.

Ky vendim ka krijuar një situatë të re dhe ne duhet të jetojmë me këtë situatë të re përderisa t’i njoftojmë të gjithë që tani është e rëndësishme të ruhet qetësia, ka thënë Fitou.

“Shpresoj shumë se krimi i organizuar nuk do të importohet apo eksportohet nga Kosova në këtë situatë të re. E nëse këto fenomene të trafikimit do të ndalen me situatën e re, kjo do të ishte gjëja më e mirë e mundshme”, ka deklaruar ai.

Ambasadori francez i ka sugjeruar EULEX-it dhe Qeverisë së Kosovës që të ulën dhe të bisedojnë për të gjetur mënyra se si të implementojnë vendimet e Qeverisë.