Imamët shqiptarë të Zvicrës u urojnë besimtarëve Kurban Bajramin

Namazi i sabahut në ditën e Bajramit në xhamitë shqiptare në Zvicër falet mes orës 6.30-7.00, kurse namazi i Bajramit mes orës 8.05-8.30

Unioni i Imamëve Shqiptarë në Zvicër me rastin e festës së kurbanit, që i bie më 6 nëntor 2011, e diel, të gjithë besimtarëve muslimanë në mbarë botën, po në veçanti myslimanëve shqiptarë në Zvicër, ua uron përzemërsisht festën e kurbanit, duke e lutur Allahun Fuqiplotë për pranim të shërbimeve e adhurimeve　ndaj Tij, për pranim të kurbanave e të haxhit, për paqe e rehati në mbarë botën, e në veçanti në botën tonë shqiptare.

Le të jetë kjo festë një rast i volitshëm i afrimit dhe i ngrohjes së zemrave të njëri-tjetrit, për shtrirjen e dorës së pajtimit, për kujdesin e shtuar ndaj të varfërve, jetimëve dhe familjeve të dëshmorëve.

Paqja dhe mëshira e Zotit qoftë mbi të gjithë ju!

P.S.: Ju njoftojmë se namazi i sabahut në ditën e bajramit nëpër xhamitë apo qendrat islame shqiptare këtu në Zvicër do të falet mes orës 6.30 – 7.00, kurse namazi i bajramit mes orës 8.05 – 8.30 min.