Imam Qazimi dënohet me 10 vjet burg

Prokuroria Speciale e Kosovës kishte ngritur aktakuzë në janar të vitit 2015 ndaj Zekria Qazimit. Ai, konsiderohen si ura kryesore që lidhte kosovarët me ISIS-in

Gjykata Themelore në Ferizaj ka dënuar me 10 vjet burg, ish imamin më kontrovers të rajonit të Gjilanit, Zekirija Qazimi, nën dyshimin se ka frymëzuar dhe indoktrinuar një numër të madh të kosovarëve për t’iu bashkuar organizatave terroriste në Siri e Irak. Bashkë me Imam Qazimin janë dënuar edhe gjashtë mbështetësit e tij.

Prokuroria Speciale e Kosovës kishte ngritur aktakuzë në janar të vitit 2015 ndaj Zekria Qazimit. Ai, bashkë me 6 persona të tjerë konsiderohen si ura kryesore që lidhte kosovarët me organizatat terroriste në Siri e Irak.

Veprat penale për të cilat është akuzuar ai ka qenë rekrutim për terrorizëm, nxitje e urrejtjes, përçarjes ose mosdurimit kombëtar, racor, fetar apo etnik.

Zekirja Qazimi ka qenë imam në xhaminë “El-Kuddus”, në Gjilan. Ai llogaritet të ketë qenë personi kryesori i cili i nxiste të rinjtë kosovar drejt organizatës ISIS. Madje shumë prej bisedave me xhihadistët kosovarë janë zbuluar nëpërmjet mesazheve telefonike, të cilat ai i shkëmbeu me bashkëpunëtorët e tij. Shumë nga ata që i përcolli Qazimi për në ISIS kanë vdekur atje si “shehid”.

“Zeiqrja Qazimi ka frymëzuar disa persona për të shkruar në Siri e ndër të cilët disa janë vrarë siç është Patriot Matoshi,” tha prokurori në gjykim.

Bashkë me imam Qazimin, për pjesëmarrje në grup terrorist akuzoheshin edhe lir Berisha, Sadat Topojani, Burim Ballazhi, Jetmir Kyqyku, Liridon Kabashi dhe Ilir Krraba. Gjykata dënoi me 8 vjet burg Ilir Berishën e me 7 vjet e 6 muaj burg Sadat Topojanin. Ilir Berisha, Liridon Kabashi e Burim Ballazhi gjatë gjykimit pranuan fajësinë.