Inteligjenca Artificiale po ndryshon mënyrën e punësimit në Zvicër

Kandidatët po e përdorin AI-n më shpejt se punëdhënësit, ndërsa kompanitë mbeten ende të rezervuara ndaj aplikimeve të asistuara nga teknologjia

Inteligjenca Artificiale (AI) po transformon mënyrën e rekrutimit dhe kërkimit të punës në Zvicër, sipas raportit më të fundit “Talent Trends 2026” të publikuar nga kompania e rekrutimit Michael Page, përcjell albinfo.ch.

Raporti tregon se 86 për qind e personave që kërkojnë punë në Zvicër përdorin AI gjatë procesit të aplikimit dhe kërkimit të vendeve të punës, ndërsa vetëm 69 për qind e punëdhënësve përdorin Inteligjencën Artificiale në proceset e rekrutimit.

Megjithatë, vetëm 39 për qind e punëdhënësve janë shprehur se aplikimet e asistuara nga AI i bëjnë më të prirur për të punësuar kandidatët.

Sipas Yannick Coulange, drejtor menaxhues i Page Group Switzerland, Inteligjenca Artificiale nuk i ka ndryshuar plotësisht rregullat e rekrutimit, por ka ndikuar ndjeshëm në ritmin e procesit.

“AI nuk i ka rishkruar rregullat e rekrutimit, por ka ndryshuar shpejtësinë e tij. Kandidatët tashmë janë përshtatur, ndërsa proceset e rekrutimit ende po përpiqen ta arrijnë këtë ritëm”, u shpreh ai.

Përdorimi i AI-së në tregun e punës po rritet vazhdimisht, sidomos për përgatitjen e CV-ve, letrave motivuese dhe kërkimin më të shpejtë të vendeve të punës, duke hapur një debat të ri mbi ndikimin e teknologjisë në proceset tradicionale të punësimit. /Albinfo.ch

---