Islanda pret rezultatin e referendumit për rikthimin e negociatave me BE-në

Numërimi i votave po vazhdon pas një referendumi të ngushtë që vendos nëse vendi do t'i rifillojë bisedimet për anëtarësim në Bashkimin Evropian

Islanda është në pritje të rezultatit përfundimtar të referendumit të mbajtur të shtunën, në të cilin qytetarët votuan nëse vendi duhet t’i rifillojë negociatat për anëtarësim në Bashkimin Evropian.

Numërimi i votave po vazhdon, ndërsa gara është shumë e ngushtë pas një fushate që u përqendrua në çështje si kostoja e jetesës, siguria, sovraniteti dhe kontrolli mbi sektorin e peshkimit, përcjell albinfo.ch.

Referendumi nuk vendos drejtpërdrejt nëse Islanda do të bëhet anëtare e BE-së. Në rast se shumica voton pro, qeveria do të mund të rifillojë negociatat me Brukselin, ndërsa një marrëveshje eventuale për anëtarësim do të kërkonte një referendum të dytë.

Islanda kishte aplikuar për anëtarësim në Bashkimin Evropian në vitin 2009, pas krizës financiare, por negociatat u ndërprenë në vitin 2013.

Debati për afrimin me BE-në është rikthyer fuqishëm vitet e fundit, i nxitur nga zhvillimet ekonomike dhe të sigurisë në Evropë. Përkrahësit e negociatave argumentojnë se anëtarësimi mund të sjellë më shumë stabilitet ekonomik dhe ndikim politik, ndërsa kundërshtarët shprehin shqetësime për humbjen e një pjese të sovranitetit dhe kontrollit mbi peshkimin.

Rezultati përfundimtar pritet të përcaktojë nëse Islanda do t’i rikthehet procesit të negociatave me Bashkimin Evropian pas më shumë se një dekade ndërprerjeje.

 

---