Itali: 75 euro gjobë për këmbësorët që përdorin telefonin kur kalojnë rrugën

Këmbësorët që kalojnë rrugën duke shikuar telefonin mund të përballen së shpejti me gjoba në Itali

Ministria italiane e Transportit ka propozuar ndryshime në Kodin Rrugor, të cilat synojnë të rrisin sigurinë në rrugë dhe të ulin numrin e aksidenteve të shkaktuara nga shpërqendrimi i këmbësorëve dhe drejtuesve të mjeteve.

Sipas projektligjit, i cili pritet të miratohet deri në mesin e muajit tetor, kushdo që përdor telefonin celular gjatë kalimit të rrugës do të gjobitet me 75 euro.

Autoritetet argumentojnë se përdorimi i telefonit gjatë kalimit të rrugës ul vëmendjen e këmbësorëve, duke rritur rrezikun e aksidenteve në situata kur drejtuesit e mjeteve nuk kanë kohë të reagojnë.

Ndryshimet janë hartuar edhe pas një sërë vendimesh gjyqësore në Itali, ku përgjegjësia për aksidente rrugore u është atribuar edhe këmbësorëve që nuk kanë treguar kujdes gjatë kalimit të rrugës.

Projektligji nuk kufizohet vetëm te telefonat celularë. Ndalimi do të përfshijë edhe përdorimin e tabletëve, laptopëve, kamerave digjitale dhe pajisjeve të tjera elektronike që mund të shpërqendrojnë këmbësorët.

Megjithatë, drafti parashikon edhe disa përjashtime. Përdorimi i telefonit do të lejohet në raste emergjente, ndërsa bisedat me pajisje “hands-free” nuk do të konsiderohen shkelje. Edhe mbajtja e kufjeve do të jetë e lejuar, por vetëm nëse nuk pengon dëgjimin me të dy veshët.

Një tjetër sqarim i rëndësishëm është se ndalimi zbatohet vetëm gjatë kalimit të rrugës. Përdorimi i telefonit gjatë ecjes në trotuar nuk ndalohet.

Përveç kufizimeve për pajisjet elektronike, projektligji vendos edhe detyrime të reja për këmbësorët. Ata duhet të sigurohen që drejtuesi i automjetit i ka vënë re dhe ka ndërmend të ndalojë përpara se të hedhin hapin në rrugë. Drafti thekson gjithashtu se këmbësorët nuk duhet të hezitojnë gjatë kalimit, pasi edhe kjo mund të krijojë situata të rrezikshme në trafik.

Paketa e re nuk prek vetëm këmbësorët. Italia planifikon të ashpërsojë ndjeshëm edhe ndëshkimet për drejtuesit e mjeteve që përdorin telefonin gjatë drejtimit. Për shkelësit e përsëritur, gjoba mund të arrijë deri në 2,588 euro, ndërsa parashikohet edhe pezullimi i lejes së drejtimit për një periudhë nga një deri në tre muaj.

Një prej propozimeve që shkaktoi debat publik nuk do të përfshihet në ligjin përfundimtar. Bëhet fjalë për idenë që drejtuesit e mjeteve mbi 85 vjeç të kufizoheshin të lëviznin vetëm brenda një rrezeje prej 100 kilometrash nga vendbanimi dhe të mos lejoheshin të përdornin autostradat. Ministria italiane e Transportit konfirmoi se kjo masë është tërhequr pas kërkesës së ministrit të Infrastrukturës dhe Transportit, Matteo Salvini.

Italia nuk do të ishte vendi i parë që ndëshkon këmbësorët për përdorimin e telefonit gjatë kalimit të rrugës. Lituania e vendosi këtë masë në fuqi që në vitin 2018, ndërsa Honolulu në SHBA ishte qyteti i parë në botë që miratoi një rregull të tillë në vitin 2017. Një masë e ngjashme u miratua edhe në qytetin japonez Yamato në vitin 2020.

---