Vijon shpërndarja e librave në gjuhën shqipe në Itali

Foto: LAPSH

Afro 4.5 mijë libra të gjuhës shqipe janë dhuruar në Itali për fëmijët shqiptarë, transmeton albinfo.ch.

Vijon dorëzimi i librave për mësimin e gjuhës shqipe dhe kulturës shqiptare në diasporën shqiptare në Itali, dërguar falas nga Qendra e Botimeve për Diasporën.

Ambasada e Republikës së Shqipërisë në Romë ka bërë shpërndarjen e teksteve mësimore dhe plotësuese për vitin shkollor 2020-2021 deri në veriun e Italisë. Së fundmi, librat kanë mbërritur në shkollën “Mësonjëtorja” në Brescia, e cila është gati për të vijuar mësimin e gjuhës shqipe online.

Qendra e Botimeve për Diasporën ka dërguar falas 4479 tekste mësimore dhe plotësuese për mësimdhënien e gjuhës dhe kulturës shqiptare në Itali.

Tekste të ndryshme shkollore, seria më e re e botimeve dygjuhëshe nga Qendra e Botimeve për Diasporën, një sërë vlerash, materialesh të ndryshme didaktike janë tashmë në dispozicion të mësuesve për mësimin e gjuhës dhe kulturës shqiptare në diasporë.