Jahjaga dhe Berisha, u takuan në Vlorë

Kryeministri  i Shqipërisë Sali Berisha është takuar me Presidenten e Kosovës, Atifete Jahjaga, në rezidencën qeveritare në Vlorë, ku ajo po kalon disa ditë pushimesh.

Duke i uruar përzemërsisht mirëseardhjen presidentes Jahjaga, kryeministri Berisha shprehu kënaqësinë që po takohej me të.

Berishai vlerësoi rolin që Presidentja Jahjaga ka luajtur e po luan në rritjen dhe konsolidimin e Republikës së Kosovës si faktor paqeje dhe stabiliteti në Ballkan, bëbë të ditur zyra për informim e presidencës kosovare.

“Kryeministri Berisha theksoi se progresi i gjithanshëm i Kosovës, funksionimi i shtetit ligjor dhe institucional kanë bërë që Kosova gjithnjë e më shumë të shndërrohet në një faktor të rëndësishëm bashkëpunimi, mirëkuptimi e integrimi rajonal. Gjithashtu, kryeministri vlerësoi vendosmërinë e autoriteteve të qeverisë së Kosovës për zbatimin e ligjit dhe të rendit kushtetues në të gjithë territorin e saj”, thuhet në kumtesë. 

Presidentja Jahjaga ka shpreh kënaqësinë e saj për këtë takim dhe e ka falënderuar kryeministrin Berisha për të gjithë mbështetjen që ai i ka dhënë dhe i jep Republikës së Kosovës.

“Në këtë takim u diskutua gjerësisht mbi bashkëpunimin politik dhe në të gjithë fushat midis Shqipërisë dhe Kosovës, për përpjekjen e përbashkët në njohjen e mëtejshme dhe konsolidimin e pozicionit ndërkombëtar të Republikës së Kosovës”, përfundon kumtesa.