Jahjaga pritet nga Havel dhe rithekson se Kosova është e pandashme

Ish-presidenti çek Vaclav Havel vlerësoi punën e presidentes Jahjaga dhe tha se vazhdon të jetë përkrahës i proceseve integruese të Kosovës

Presidentja Kosovës, Atifete Jahjaga është takuar me ish- presidentin e Republikës së Çekisë, Vaclav Havel, në kuadër të Konferencës “Demokracia dhe Sundimi i Ligjit” të organizuar nga Forumi 2000, që drejtohet nga zotëri Havel.

Ish- presidenti çek Vaclav Havel e vlerësoi punën e presidentes Jahjaga në udhëheqjen e shtetit të Kosovës dhe ka thënë se ka qenë dhe vazhdon të jetë përkrahës i proceseve integruese të Kosovës, bën të ditur Presidenca.

Ai ka shfaqë interesimin e tij për zhvillimet në Kosovë dhe për rrugën e saj drejt integrimeve evropiane.

Kurse presidentja e Kosovës, Atifete Jahjaga e ka falënderuar ish- presidentin çek Havel për mbështetjen e tij dhënë Kosovës në të gjitha periudhat dhe tha se përkrahja e Republikës së Cekisë për Kosovën ka një rëndësi të veçantë.

Jahjaga ka theksuar se për Kosovën është e nevojshme vendosja e marrëdhënies kontraktuale me BE-në, që do të ndihmonte përshpejtimin e reformave të brendshme, zhvillimin më të shpejtë ekonomik dhe do të hapte perspektivën e qartë për vendin, thuhet në njoftim.

Ajo ka thënë se Kosova është shtet i njohur ndërkombëtarisht në tërësinë e saj tokësore dhe tha se ndarja, shkëmbimi i territoreve, ri aranzhimet e brendshme territoriale, ose Ahtisaari Plus janë të papranueshme.

Në këtë rast, presidentja Jahjaga tha se Propozimi Gjithëpërfshirës i Presidentit Ahtisaari ofron vetëqeverisjen optimale për serbët në Kosovë pa marrë parasysh se në cilën komune të Kosovës jetojnë.