Jahjaga: Shqiptaro- amerikanët, kontribut të jashtëzakonshëm në bërjen e shtetit

Me mirënjohje të veçantë u nderuan ish-kryeministri britanik, Tony Blair, dhe diplomati amerikan, Richard Holbrooke

Presidentja e Republikës së Kosovës, Atifete Jahjaga, mori pjesë në manifestimin e shënimit të 15-vjetorit të aktivitetit të Këshillit Kombëtar Shqiptaro-Amerikan.

“Në këtë manifestim, me mirënjohje të veçantë për kontributin e madh të dhënë për Kosovën u nderua ish-kryeministri britanik, Tony Blair. Gjithashtu, për kontributin për Kosovën, u nderua post mortem edhe diplomati amerikan, Richard Holbrooke”, thuhet në kumtesën e Presidencës.

Sipas kumtesës në manifestim ishin të pranishëm edhe kryeministri i Kosovës, Hashim Thaçi, kryeministri i Shqipërisë, Sali Berisha, zëvendëskryeministri i Maqedonisë, Musa Xhaferi, ambasadorja e SHBA-ve në Kombet e Bashkuara, Rosemary DiCarlo, zëvendësndihmëssekretari amerikan i Shtetit për Evropë dhe Euroazi, Philip Reeker, kongresisti Eliot Engel e figura të tjera të rëndësishme nga fusha e politikës, e artit dhe biznesit.

Në këtë manifestim, presidentja Jahjaga u shpall anëtare nderi e Këshillit Kombëtar Shqiptaro-Amerikan.

“Shqipëria nuk u krijua në gjithë territorin kombëtar, por falë përkushtimit të atdhetarëve në të gjitha trojet shqiptare u mbajt gjallë ideja kombëtare. Bërja dhe stabilizimi i Shqipërisë, si rrëfimi më i suksesshëm i historisë sonë, ndër të tjera, i referohet në masë të madhe kontributit të jashtëzakonshëm të komunitetit shqiptaro-amerikan”, ka thënë Jahjaga në fjalimin e saj.

Ajo ka thënë se gati njëqind vjet më vonë, bërja dhe stabilizimi i shtetit të Kosovës, si rrëfimi tjetër më i suksesshëm i historisë kombëtare, i referohet pikërisht kontributit të jashtëzakonshëm, të pashembullt dhe të papërsëritshëm të komunitetit shqiptaro-amerikan.